“Tured ti kasapulan tapno makaputar kadagiti daniw a mangyallangogan kadagiti immunan a naibalikas a nasken ketdi a maulit-ulit a maputar ken kadagiti mabalin a masangalto pay laeng apaman a maibalikas manen dagitoy a binatog. No ti pagsasao ti kangrunaan a pakabuklan iti realidadtayo, ket ti panagdaniw ti katan-okan a panangsangaltayo iti kananakemtayo, ti ngarud panagtultuloy a panagputar ken panangilibro—kasta met iti panagbasa—kadagiti daniw, ti basar ti pudno a nadur-as ken nainkalintegan a kagimongan. Daytoy Manen, natured ngem napakumbaba nga awis iti mamagbaliw a gimong. Ta adda ta adda mabaliwan a tignayen dagiti daniw iti daytoy.”—JUNLEY LORENZANA LAZAGA, UP Baguio *** “Ti panagmennamenna iti napintas ken naimbag ti maysa a gagem dagiti mannaniw. Ti sabali pay ket ti panangsaranget ken panangdait iti linabag dagiti agdadata a di makainatad ken panangsinunuo no ania ti nasaysayaat nga addang para iti masakbayan ken wayawaya. Kabaelan ni Ariel Sotelo Tabag dagitoy a dua. Iti daytoy a libro, nalawag ti laingna kas agdadait kadagiti balikas ken kas pilosopo a manggutgutugot kadagiti dardarepdep, pakasaritaan, ken paltiing iti biag.”—MARK TABUNAN, University of Northern Philippines