တစ်ခေတ်တစ်ခါက လက်မှတ်ရဖို့အရေး တန်းစီတိုးဝှေ့ကြရသည့် ရုပ်ရှင်ရုံများ အကြောင်း၊ ရုပ်ရှင်ရုံတွေကို မှီခိုပြီး လုပ်စားသွားကြသည့် ရုပ်ရှင်လက်မှတ် မှောင်ခိုများအကြောင်း၊ ဘေးနားထိုင်ပြီး ပြောသလိုခံစားရမည့် တစ်ချိန်က ပရိသတ်ရင်ထဲ ထိခဲ့သည့် ရုပ်ရှင်ဇာတ်ကားများ အကြောင်း၊ ဇာတ်လမ်းနှင့် စပ်ဟပ်တည့်လှသည့် ဇာတ်ဝင်တေးများအကြောင်းကို ဆောင်းပါးများ ခွဲ၍ ရေးသားမျှဝေထားခြင်း ဖြစ်သည်။ မြန်မာ့ရုပ်ရှင်နဲ့ပတ်သက်ပြီး ကောင်းခြင်း၊ ဆိုးခြင်းတွေကို စေတနာအရင်းခံပြီး ထောက်ပြထားသည်ကို စာအုပ်တွင် တွေ့ရမည်ဖြစ်သလို ရုပ်ရှင်ကို ရူးသွပ်စွာ ချစ်မြတ်နိုးသူတစ်ယောက်၏ စစ်မှန်သောစိတ်ရင်းကိုလည်း စာအုပ်မှတဆင့် မြင်တွေ့ရမည် ဖြစ်သည်။ ငယ်ငယ်တုန်းက ဓာတ်ရှင်တွေအကြောင်းနဲ့အတူ ကျော်ဖြတ်ခဲ့ဖူးသည့် ခေတ်တစ်ခေတ်၊ ကုန်ဆုံးသွားခဲ့တဲ့ ငယ်ဘဝတွေကိုလည်း ပြန်လည်သတိရ လွမ်းဆွတ်မိစေမည့် စာအုပ်လည်း ဖြစ်သည်။