श्रीमान् श्रीमतीका बिचमा आदान प्रदान भएका र एक्लो एकान्त समयमा पढिने गरेका यस्ता चिठी सार्वजनिक गर्न नहुने हो कि ? यस्तो सोचेर पनि जे होला, पुस्तकाकारमा ल्याउनैपर्छ भन्ने लाग्यो । किनभने हामी दुईको विवाह आपसमा चिनजान र बोलचाल नभई परपरैका कुराकानीबाट भएको हो । त्यसकारण विवाहपूर्व प्रेमालाप, मन, इच्छा भाव प्रकट गरेर प्रेमी-प्रेमिका जोडी बन्ने कुरै भएन । त्यतिबेला पनि अरुअरु ककसले विवाहपूर्व नै प्रेम रोमान्स पछि विहे गरेका कुरा सुने देखेको पनि हो । हाम्रो चाहना हो आजका साइवरे, हलो, हाइ, आइ लभ यू, प्रेमि-प्रेमिका वा नवजोडीले त्यसबेलाका यी हाम्रा चिठी र चिठीभित्रका विचार भाव पढेर हाम्रो समय र सन्दर्भ बुझिदिउँन् । बुढाबुढीले के जान्दछन् के थाहा पाउँछन् र ! भनेर आजका युवाले नाक न खुम्चाइदिउन् । हामीले हिम्मत गर्यो- यी पत्र छाप्न । जे जसो होला भनेर पाठकसामु ल्याएका छौं । सम्भवतः यस प्रकारका पत्रहरू अन्य कुनै जोडीका छापिएका छैनन् । अथवा छन् । हाम्रो अज्ञान हुनसक्छ हामी दुईको देखादेख भएको चवन्नों वर्षको शुभअवसर पारेर यो चिठीपत्र सार्वजनिक गरेका छौं ।